Üsi Gschicht
Wis derzuä cho isch
D Trachtägruppä Neuenegg und Umgäbig isch 1936 ire nid ganz eifachä Zit gründät wordä. Vom Usland här si dunkli Wuuchä ufzogä, wo ä nöiä Wäutchrieg akündät hei. Nöii politischi Idee und Programm si ufcho u üses Schwizerland isch denn i mängem uf d Prob gsteut wordä.
Erfröilächärwis si grad i derä Zit, vorauem hiä im Bärnbiet, viu Trachtägruppä gründät wordä, u so äbä o hiä bi üs z Neuenegg. Mä het grad bsungers denn z Gfüüu gha, ds Trachtäwäsä sig öppis Bodäständigs, öppis Reins u Edus wo so richtig ds wahre Schwizertum u dr Heimatsinn zum Usdruck bringt.
I dä Gründerjahr het's i dä meischtä Trachtägruppä numä Frouä gha, u so o bi üs. Us däm Grund isch o d Gründig vo üsärä Gruppä uf Frouä zrugg z füärä. Zu denä Gründerinnä, wo eifach dür e eiget Isatz Mittglider gsuecht hei ghörä:
ds Greti Bigler - Bausiger, Landgarbe Emma Grunder - Lauper, Brüggelbach
ds Kläri Leu - Frauchiger, Neuenegg
ds Hanni Müller - Wysmann, Bramberg
ds Hildi Staub - Gurtner, Neuenegg
ds Hanni Wysmann - Hurni, Bramberg
Die sächs Gründerinnä hei guäti Arbeit gleischtät. Innert churzer Zit hei si e schönä Floor vo Trachtäfrouä zämä gha. Chum si sie einigermasse binenang u organisiert gsi, si sie scho ds Jahr druf zum erschtä Alass, a ds Trachtäfescht Lützuflüeh.
Di erschtä Schrittä
Na dr Gründig vo üsärä Trachtägruppä het's nid numä bim Tanzä die erschtä Schrittä gä z machä. Da früsch bachnig Verein het zimläch ungezwung, aber vor auem unerfahrä agfangä: Statutä hets no kenär gäh u ä komplettä Vorstang o nid. Mä isch ono kerä übergordnätä Trachtävereinigung agschlossä gsi. Mä het agfangä mit angärnä Trachtägruppä Verbindig ufgno u gluägt, was u wie's die öppä machä. Zum Glück hei mir scho vo Afang ah tüchtägi Presidäntinnä gha. Die erschti isch ds Tildi Stoub - Gurtner gsi. Sie het grad auäs a d Hang gno, bsungers äbä o d Arbeit, wo hüt d Sekretärin oder d Kassiererin übernimmt.
Es isch für d Trachtägruppä o ä grossä Vorteu gsi, dass mä grad sofort für ds Leite vom Tanze u Singä e bsungärs geignäti Chraft gfungä het, ds Hanni Rohrbach.
Was auäs gangä isch u no geng geit
Währendem Chrieg isch weni bis nüt los gsi, wie i viune Vereinä. Nachem Chrieg isch dr erscht gross Aalass womer mitgmacht hei ds Unspunne - Fescht gsi. Uf das abä hets de o i üsärä Trachtägruppä ä grossi Veränderig gä. Vo denn a hetmä nid numä Mannä la häufä, bispiuswiis bim Theatärä, sondern beschlossä, dass ab ids o Mannä im Verein ufgno wärdä.
Ar Houptversammlig im 1948 isch de o grad dr erscht Maa für näs Ämtli gwäut wordä.
Äs witters grosses Ereigniss isch d Nöiinstrumäntierig vor Neuenegger Musig im 1972 gsi. Denn isch d Trachtägruppä ghörig zur Ehr zogä wordä.
Zu aune Zyte isch ds Tanzä u Singä d Houpttätikeit vo üsem Verein gsi. Mit fröid gö mir bis hüt id Chiuchä ga singä. Au Jahr im Herbscht dörfä üser Sänger dr Ärntedankgottesdienscht musikalisch ungermale.
Ä witteri Tradition isch z Singä u Tanzä im Betagtezentrum Laupen, für dert dä Lüt e chlini Fröid z machä.
Bi de Vereinsmitglieder ä gschetzti Tradition isch o di alljährlechi Vereinsreis womer zämä ungernämä.
Grössäri Aläss wi Trachtäfescht, Regionalträffe, etc. bsuächä mir gärn u fröiä üs immer wes ä Alass git üsi Tracht fürä z näh u z tragä.
U nätürläch z gröschtä Highlight für aui Mitglider si d Ungerhautigsabä wo mir au zwöi Jahr im Restaurant Zimmermann ir Süri dörfä düräfüärä.
Dert zeigä mir, was mir so ds ganzä Jahr dürä machä am Mäntigabe. Derzuä chunnt es Theater, ä grossi Tombola oder Zwirbälä. Mir fröiä üs immer we dä Alass guät bsuächt isch u mir dä Lüt chli ä gmüätlächä Abä u guäti Ungerhautig biete.
Wis witter geit
Nach däm d Jahr 2020 - 2022 mit dr Pandemie nid ganz eifach si gsi, fröiä mir üs, dass mir ids wieder vou im Vereinsläbä dörfä stah.
Üs isches nach wi vor z gröschtä Aligä, zämä d Tradition z pflegä. D Zit bim Singä u Tanzä zämä z gniesse u d Tracht immer mit Stouz z tragä.
Mir fröiä üs dörfä derzue biztragä, die schwizerischi Kultur am Läbe u Loufä z phautä.
Gspannt luägä mir id Zuäkunft u hoffä, dass mir no mängisch zämä dörfä z Trachtäwäsä gniesse u läbä.
Momäntan si mir 31 Aktiv- und 49 Passivmitglider